هذي مرثيه في ابوي خالد الله يرحمه ويسكنه فسيح جناته ويجعل منزلته مع الانبياء والصالحين..
امسح دموع الحزن لا تجرح العين
واصبر ولو مافيني صبر وجلاده
لو الحقيقيه ضايق وخاطري شين
وبالمختصر ويني ووين السعاده
من يوم ماجاني خبر بين قوسين
قالوا توفى اللي حياته عباده
عمي وعمي من رجالٍ عزيزين
خالد عسى موته ياربي شهاده
وينك يا أبو رشدان شيخ الميامين
وينك ياراسٍ ماتخيل بعاده
تبكيك ضحكات اليتاما المساكين
ويبكيك من هو جاليٍ عن بلاده
وسجادته مركاه ووجاره الزين
وتبكي على فرقاه حتى الوساده
من ضيقتي كن الفضا صار شبرين
والرجل كنها مقيدتها قياده
أروح وأرجع وانظر يسار ويمين
ولامن طرالي زاد همي زياده
يطري علي اللي له سنين وسنين
مريض لكن فيه عزم وإراده
ياالله ياللي خالق آدم من الطين
تغفر لشيخٍ ما مشى بالنقاده
وافي ولاخوانه سواة الكريمين
ولمن نقصهم شي بالخير زاده
يارب عبدك شاف جور الامرين
من المرض وزداد صبر وجلاده
يارب عدّا عمر حول الثلاثين
وقضا حياته بين صبر وعباده
اغفر لبو رشدان ياخالقي لين
يصير موته يا إلهي شهاده
رشدان بن فهد العرفج
